Look: Anti Marcos burial protesters, di alintana ang malakas na ulan

Tinatayang nasa 1,500 katao ang dumalo sa programa sa Luneta Park sa lungsod ng Maynila bilang bahagi ng Black Friday Protest para kondenahin ang palihim na paglilibing sa mga labi ni dating Pagulong Ferdinand Marcos noong nakaraang linggo.

Dakong alas-4:00 ng hapon nang makarating ang iba't ibang grupo sa Luneta Park para magsagawa ng programa.

Hindi naman makapasok ang mga raleyista sa loob ng grandstand dahil bantay sarado ito ng PNP.

Ilan sa mga nagprotesta ay galing sa Katipunan Avenue na kinabibilangan ng mga estudyante ng University of the Philippines (UP), Ateneo de Manila University (ADMU) at Miriam College.

Ang ilang grupo naman ay nanggaling pa sa Mendiola at Morayta kung saan sila unang nagsagawa ng programa bago tumulak sa Luneta Park para sa mas malaking protesta.

Iginiit ng mga raleyista na hindi karapat-dapat na ilibing ang dating pangulo sa Libingan dahil sa paglabag nito sa karapatang pantao at sa isyu ng kurapsiyon.

Karamihan sa mga nagprotesta ay mga estudyante o mga millennials.

Kabilang din sa mga sumama sa protesta ay ang mga manggagawa, magsasaka, urban poor, progresibong grupo at mga biktima ng Martial Law gaya nina dating Bayan Muna Reps. Neri Colmenares at Satur Ocampo director na si Joel Lamangan at dating Sen. Rene Saguisag.

Samantala, may mga nagprotesta ring suportado ang desisyon ng Pangulong Rodrigo Duterte na ihimlay ang mga labi ng dating pangulo sa Libingan at iginagalang daw nila ang desisyon ng Korte Suprema kaugnay pa rin sa usapin ng paglilibing kay Marcos sa Libingan.